تعقيب علي بنت مصرية حول الثانوية العامة

Body

قرات عند بنت مصرية.

احب ان ادلي بدلوي في الموضوع لاني قد مررت بهذه المرحلة
بالاشارة لهذه التجربة: البيه ساقط ثانوية عامة كما يدعي. بالمفهوم الرياضي هو لم يرسب. و انما رسب بالمفهوم المجتمعي و الدليل انه دخل كليه فعلا.

لما تفكر في انسان مهما كان كويس مادخلش كليه هاتكتشف مشكله من اول حصوله علي وظيفة ثم ربما الزواج من فتاه يحبها بسبب معارضة الاهل "فين شهادتك ؟"
مع شديد احترامي: المشكله مشكلة مجتمع ككل. عايز واحد من اللي معترضين علي مشكلة الجامعه يحط نفسه في موقفين:
الاول و هو مش معاه شهاده و يشوف هايجيب شغل لنفسه بسهوله ولا لا
التاني لو واحد ماعهوش شهاده جه يتقدم لبنتك او ابنك اللي معاهوش شهاده رايح يتقدم لواحده. ده اصلا لو انت سبت ابنك او بنتك تسقط ثانويه عامه.

بما ان المشكله مشكلة مجتمع "و بصراحه المجتمع ده عايز النسف" يبقي يا تلعب بقواعد المجتمع يا تغير المجتمع كله مره واحده.

خلصنا من اول نقطه ؟ نتكلم باه في التانيه وهي الاصعب:
الثانويه العامه و الامتحانات.

المشكله في نظام تعليمي بايظ بايظ بايظ لاقصي حد لان فيه ناس بقت بتاخد دروس من ابتدائي و حصلت قدامي
بالاضافة لعدم تنمية القدرات الابداعيه عند الطلاب و بالتالي تحول الامتحان لحفظ و ترجيع "سوري لم اجد كلمه مهذبه"

طب انا كنت هاسقط ثانويه عامه بسبب علم النفس و الاجتماع: لو كنت وقفت علي شعر راسي ماكنتش عديت.
عديت احياء و كيمياء و رياضه 2 و فيزياء و كنت هاسقط علم نفس!!!

ماده ادبي يا جماعه ماتدخلش عندي... مش نافعه!!

الناس لازم تفهم ان ملعون ابو شهادة الجامعه. خدها و اركنها ولع فيها او اقلي عليها بطاطس "بس الاحسن تشيلها علشان هاتحتاجها".

انا معايا بكالوريوس العلوم الصيدليه من جامعة القاهرة "انا اتخرجت دور تاني بالمناسبه" بس شغال دلوقتي مطور برمجيات و اللي عارفني عارف انا شغال فين.

توفيق ربنا ؟ اكيد الحمد لله.
مين علمك ؟ علمت نفسي.
تعبت ؟ اه بس الحمد لله

طبعا مانكرش ان بابا و ماما كان ليهم دور فعال من و انا صغير ماوعاش علي الدنيا و طبعا ده توفيق ربنا في الاول و الاخر بس النقطه اللي باقولها هي ان ماينفعش ماينفعش ماينفعش نعتمد علي شهاده و اتخرج اقعد علي القهوة و بعدين العن البلد و الحياه و الحظ

طب انا مش عارف انا ايه اللي خلاني اكتب الكلام الفارغ اللي فوق ده ولا فاهم الناس بتقراه ليه و مش عارف انهيه ازاي!!

Add new comment

The content of this field is kept private and will not be shown publicly.