الصور هنا
سورى مش حلوه اوى بس الدنيا كانت ضلمه و اللى مش عاجبه ينزل يصور احسن منها!
دى اول مظاهرة اروحها باختيارى
اول مره كانتالوقفة الاحتجاجية على اللى حصل مع اللاجئين السودانيين اللى كانت امام جامع مصطفى محمود بس دى كنت مروح و بالصدفة قابلت صحابى :-)
المهم و انا داخل على ميدان التحرير "كان معايا ناس صحابى" و شفت العلم فكرت اخد صور و بعدين بصراحه خفت
فكرت تانى: هاتفضل خايف لامتى ؟ و بعدين و انا مروح فكرت ان لو هارتبط بواحده فى يوم من الايام و لو هاجيب عيال "اعوذ بالله" اقل حاجه ممكن اعملها لو انا باحبهم فعلا ان احاول على قد ماقدر اضمنلهم مكان احسن يعيشوا فيه "بس ده مش معناه انى هاروح المظاهرة الجايه"
المهم منال و سقراط و غربيه و مالك و نديميات كلهم كانوا هناك "نورا شفتها دقيقه و مشيت"
علاء جاه بعد شويه كان بيجيب بطاطين
انا برضو مشيت بدرى. واضح ان انا عجزت على الحاجات دى!!
طبعا الحيوانات بتوع الحكومه كانوا مطفين النور فى الميدان
طبله و مايكروفون:
باطل باطل
حسنى مبارك ... باطل
الانتخابات ... باطل
جمال مبارك ... باطل
امن الدوله ... باطل
مجلس شعب ... باطل
مجلش شورى ... باطل
الحزب الواطى ... باطل
اللاديموقراطى ... باطل
هتافات: بلادى بلادى بلادى
مش فاهم طبعا الناس مصممه انك تكون تبع حاجه و السؤال: انت ايه ؟
يا جماعه مش مهم مش فارقه
انا تبع اى حاجه ماعدا الحزب الوطنى "انت نفسك ممكن تكون حزب وطنى و انا مش عارف" المهم انت جاى هنا مش المهم انت تبع ايه
طبعا احسن اجابه اللى سمعتها من منال فيما بعد انك تقول لهم "انا تبع حركة 30 فبراير"
حوار مع واحد
اتفضل اقعد معانا
لا شكرا انا واقف
معاك سجاير ؟ "طلعت له واحده من جيبى"
معاك 2 جنيه اروح بيهم ؟ "بيسالنى و انا باولع له"
لما انت معاكش تروح جيت ليه ؟
انا مش جاى عشانكم.
عشاننا مين ؟
عشانكم
ايوه احنا مين ؟
الناس دى "بيشاور على الناس اللى قاعه"
و انا قلت لك تيجى عشانهم ؟ ولا حد قال لك تيجى عشانهم ؟
انا جيت اقول كلمتين و امشى
بص: لو انا قلتلك ماتقولهمش يبقى وقفتى دى مالهاش لازمه
سبته و مشيت
ناس كتير مش مصدقه انى مصرى و اسمى محمد
واحد قلتله 3 مرات و الرابعه قلتله خلاص انا قلتلك و لو مش مصدق انت حر مش فارق معايا
طبعا انا مش عارف هل العدد اللى موجود ده قليل ولا كتير ؟ انا شايفه قليل بس منال بتقول كده كويس "انا اول مره اروح الحاجات دى فا مش عارف :-)"
ياسر نديميات مستغرب ان انا جيت و بيقولى احنا بتوع الحاجات دى مش انت
برضو يحرق الجنو لينوكس اصله كان بيسالنى على توزيعه عربى
انا كنت كاتب بوست غير دى بس حاجه حصلت و فقدتها و فى الاغلب اول مره كانت احسن بس كفايه كده
بالمناسبه. انا قلتلكم انى لما عرفت ان علاء ناوى يدون من هناك بال SMS فكرت اوقف مدونة مصطفى غلاسه ؟ :-) بس ماعملتش كده و مش هاعمل!
الناس لسه قاعدين لحد دلوقت و لحد الساعه 11 بعدها مش فاكر هايتحركوا يروحوا فين.
- 6267 views
Add new comment