لا تعليق على دى حشريه...

نازل التحرير من المعادى فشاورت لتاكسى:
تحرير ؟
فين فى التحرير ؟
الميدان نفسه
تدفع كام ؟
هاديك X
طب ما تهزها حبه ؟
انا قلت اللى عندى. قول انت بقه
عايز Y
مافيش مشاكل

و ركبت معاه
...
طلعت سيجارتين و عزمت عليه بواحده:
لا مابدخنش
طب تضايق لو انا ولعتها ؟
بصراحه...
"قاطعته" تضايق ؟ ولا يهمك مش هاولعها
...
هو انت مصرى ؟ "ده سؤال باتساله كتير"
اه يا سيدى
يعنى مش مختلط ؟
لا ياسيدى ابويا و امى مصريين و جدودى كمان
و الشعر الاصفر ده ؟ "مش فاكر قال جبته منين ولا لا"
خلقة ربنا باه
تلاقيك مضبط مع اجانب. اتنين تلاته كده
لا مش مضبط ولا حاجه
...
اتصلت بالتليفون و دار جزء من الحوار ده:
انا: و انت مضايق منه ليه ؟
عشان موضوع *** "انا حذفت الاسم"
باولك ايه ؟ ينعل ابوك و ابو *** و ابو *** "انا حذفت الاسامى برضو"
...
خلصت تليفون و قلت رغاى!
السواق قاللى عشان تحرم تتصل بيه تانى
ماينفعش
كام دقيقه ؟
"تجاهلت السؤال تماما و كنت باعمل تليفون تانى بس ماحدش رد عليا"
هو: اسم الكريم ايه باه ؟
محمد
عاشت الاسامى
تعيش ربنا يخليك
الاخ مسلم يعنى
الحمد لله اه
طب انا عايز اقولك على حاجه
قول انا سامع
فيه حديث بيقول "اكبر الكبائر..."
مش عايز اسمع
ليه ؟ دانا هاقولك حديث
مش عايز اسمع نزلنى هنا
"كنا وصلنا كورنيش المعادى فى هذه الاثناء"
طب لو عايزنى ماكلمش معاك قول و انا مش هاكلم
باقولك نزلنى هنا

الراجل ركن
اديته 5 جنيه و قلتله ربنا يباركلك. سلام.

انا اللى غاظنى كم الحشريه اللى عنده و لا تعليق.