Writings Photos Code Contact Resume
خزعبلات

You are here

Submitted by msameer on Mon, 19/09/2005 - 2:58pm

بالهام من طق حنك و ايمان.
لا اعدل الشبشب عشان ما يبقاش فى وش اللى خلقك
مش عارف لو انت واخد عيل على حجرك و احم احم عملها عليك يبقى مش عارف ايه هايحصل
اللعب بالمقص فتح و قفل بيقصر العمر
تعمل عروسة ورق و تقعد تخرمها بدبوس و انت بترقى شخص من كل اللى ممكن يحسدوه او يكونوا حسدوه و بعدين تحرقها
الا ايه موضوع القطط و السوداء منها بالذات ؟ لو عدت قدامك من اليمين غير من الشمال غير لو لمحتها غير لو نونوت غير لو عدت من وراك
عشان ما تدحسدش ادبح دبيحة و عوص ايدك من دمها و "الطع" بصوابعك الخمسة على العربية او العماره او اى هباب ازرق تكون اشتريته "و يا سلام بقة لو انت لابس حاجة بيضاء :-)"
لما تقلب"يعنى تقوم بتقليب" كوباية الشاى و يبقى فيه فقاقيع بعد ما تخلص "بيسموها فلوس" يبقى ها يجيلك فلوس "انا مفلس يمكن عان مش باشرب شاى ؟؟"
فى الفرح كل البنات اللى مش مجوزين يقفوا ورا العروسه و هى تديهم ضهرها و ترمى بوكيه الورد اللى فى ايدها و اللى تلقفه فيهم يبقى هاتتجوز
موضوع ان لما تكون بتاكل و الاكل يقع منك يبقى فيه حد قريب منك جعان اعتقد فيه شىء من الصحة بس مش عارف

موضوع الشعر و الاظافر ده اعتقد ليه علاقة بالسحر عشان ممكن تعمل عروسه شبه اللى انت عايز تاذيه وتحط عليها حته من شعره او شعرها و تقعد تقول كلام كده مش عارفه بس من عينة "الدربندوخ الدربندوخ" و الحجات دى و تقوم جايب دبوس ترشقه فى العروسه يقوم يموت و حاجات كده - اعتقد دى تابو له علاقة بالسحر
ما تفتحش شمسيه فى البيت و مش فاكر ليه ولا عارف ليه
بس بجد فيه حاجة
كنت مرة قاعد مع واحد اول مرة اشوفه و قاللى انه بيعرف يقرا الكف
قلتله ورينى فا مسك ايدىو قاللى كلام مش فاكره بس فى النص قاللى انت بتحب و اسمها "x" مش عارف بس انا كنت معجب بواحده فعلا و ليها نفس الاسم و ماكنتش قلتلها "انا عمرى ما قلت لواحده انى معجب بيها اصلا ما عدا مره واحده و قالتلى لا من غير اسباب" يعنى اكيد هو ماكنش عارفها
عرف ازاى الموضوع ده ؟ الله اعلم.

فيه كمان حاجة
زمان لما كنت فى ابتدائى كان فيه واحد صاحبى عايز اشوفه
حلمت بالليل انى واقف قدام العماره هو جاى بالعجله بتاعته و وقف قدامى و كان لابس حاجه من فوق لونها اخضر فاتح على فيروزى
الموقف ده اتكرر بالضبط تانى يوم

انا كل نص فى دماغى بيلف عكس التانى :-)

Comments

Submitted by Eman M (not verified) on Wed, 21/09/2005 - 5:57am

وهم!
إحنا محتاجين نلم المعلومات دى كلها فى صفحة واحدة.
هية بتفرق القطة عدت من اليمين ولا الشمال؟!؟! طب لو عدت بزاوية 35 درجة؟
أول مرة أسمع عن تقليب الشاى و الأكل لما يقع، وطلع فتح الشمسية جوا البيت بيجيب نكد!

على موضوع الكف، أنا عمرى ما بصدق الكلام دة و لا عمرى هاصدقه، التفسير الوحيد عندى إن إسم البنت إسم متداول مثلاً أو جه كدة يعنى.
موضوع الحلم دة، دى حاجة علمية بيسموها "Deja Vu" .. هى حصلتلك مرة واحدة بس؟؟؟
دى بتحصلى بمعدل سبع مرات فى اليوم :) -- أنا لية حكايات كتيرة مع الأحلام اللى بعيشها فى الحقيقة بعديها..بس بيبقى إحساسها غريب أوى فعلاً

يلا عايزين نجمع كل الحاجات فى الموضوع دة من عند محمد و أنا و إنت و التعليقات اللى عندنا كلنا، لأن الناس قالت حاجات كتير برضه، ممكن نعملها ويكى :)

Submitted by msameer on Wed, 21/09/2005 - 12:20pm

الحلم ده حصلى يمكن مرتين او 3 بس انا تاريبا بطلت احلم عشان بنام و انا مهدود :-)

طب اقول حاجة تانية ؟
مرة كنت راكب تاكسى و السواق قاللى كذا حاجة:

1) عامل الناس بعقلك مش بقلبك
كنت ساعتها عايز اسيب عمرو جالد بس كان صعبان عليا

2) مشكلتك انك عاطفى
انا كنت الى حد ما مرتبط بالمكان
انا عموما بارتبط بالمكان و الاحداث
حتى يوم ما كنت باسيب it synergy كنت متضايق رغم ان كان طالع عينى

3) اتقى ربنا فى عصبيتك
انا دايما قاعد على اعصابى :-) بس هو عرف منين ؟
انا فاكر يومها كنت هادى جدا و سرحان. يمكن باين عليا ؟!!

4) اللى معاك مش ليك حتى لو ماسك عليه ايدك كده
ده برضه صح
مشكلتى انى مش باقول لا لاى حد حتى لو مش عايز اعملها
علشان كده واحد من الاهداف بتاعتى السنة دى انى اقول لا لو مش عايز

5) الناس اللى معاك دول مش ليك
مش عارف !

هو الكلام ده عام و ممكن يتطبق على اى حد بس المشكله انه جاء فى وقته و انا كنت بفكر

المهم انو قاللى فى الاخر عد ورايا واحد اتنين تلاتة اربعه و هى دى عدد حروف اسمك

ممكن برضو لان محمد اسم شائع فى مصر بس افرضى طلع غلط
يحط نفسه فى موقف زى ده ليه من الاصل ؟؟

بمناسبة الويكي
Suggest a name and I'l be glad to host it.
I was thinking about egypt.foolab.org but I'm not sure whether it's fine or not!

Add new comment

Subscribe to /  digg  bookmark