Writings Photos Code Contact Resume
تفاؤل

You are here

Submitted by msameer on Sat, 21/01/2006 - 1:34pm

ايه يا BooDy متضايق ليه ؟


ناقم على البلد اللي عايش فيها و لازم اسافر لآخر الدنيا علشان الاقي شغل

مبسوط علشان هسافر اشتغل و اشوف الدنيا و علشان لما اجى راجع اجازه هاشعر باشتياق لمن احبو هاتبسط لانى هاحسسهم باشتياقى


ناقم على جزء كبير من الشعب بيطالب بالحريه و بيرفض إعطائها لغيره

مبسوط لانى هاعرف انى احسن منهم و ممكن الاقى فرصه احاول اغيرهم يعنى هاعمل حاجه للناس


ناقم على جزء كبير من الشعب بيرفض احتقار الخليجيين له و في نفس الوقت بيحتقر اللاجئين السودانيين

مبسوط لانهم كشفوالى واحد من اهم العيوب وهاخد بالى علشان ماعملش زيهم


ناقم على الحكومة الدكتاتورية المقنعه بقناع من الطيبه و الديموقراطية المزيفة

يبقى عندى هدف اسعى له لال وهو العمل على تغيير هذا الشى
علشان اقل حاجه اعملها للناس اللى باحبها انى احاول اخليهم يعيشوا فى بلد احسن


ناقم على الحكومة اللي بتكافئ الفاسد و القذر و عديم الأخلاق و بتدفن الكفائة و الشرف

مبسوط لان ده بيخلينى مختلف بل و احسن منهم و يخليهم يحقدوا على علشان مش عارفين يبقوا زيي


ناقم على وزير بيهدد بمحاسبة المسئولين عن خطأ حصل لفنانه بتشفط دهون و دلوقتي في غيبوبه و ضحايا مسرحية بني سويف دمهم راح هدر و كأنهم كلاب بل الكلاب لهم سعر أغلى

كويس اهم هايتحاسبوا و يمكن يتغيروا و اللى بعدهم يكونوا احسن


ناقم على الجيش اللي ضيع سنه من عمري مستني ورقه علشان اعرف اروح آخر الدنيا الاقي شغل و في الآخر غلط الجيش غلطه زودت كمان شهر

مبسوط عشان ممكن فى السنه دى اتعلم لغة برمجه جديده او اطور من نفسى


ناقم على شيئ و ليس شيخ اسمه محمد هدايه قبض قرشين علشان يدعم كلب الحزب الوطني في الانتخابات و بتفتح له الفضائيات ابوابها و مشايخ شرفاء آخريين بيتسائلوا في نهاية خطبة الجمعه يا ترى هيروح بيتهم ولا على امن الدولة النهارده

مبسوط عشا عرفت ان الراجل ده بطيخه و كمان عرفت ان الناس كلها مخدوعين فيه
هدف لحياتى ان اجعل الجميع يرى هذا


ناقم على كل اللي جنبي و مصرين يحولوني لنسخه منهم لأن هو ده النجاح في نظرهم

مبسوط علشان هم مش هايعرفوا و اكيد ممكن اتعلم منهم الصبر و كيفية التخطيط و المثابره على هدف


ناقم على إني لازم اضحك و بصوت عالي كمان لأني بكره شعور ان حد يحس بالشفقه تجاهي

مبسوط علشان باقدر اضحك فى عز الازمات :-)

Comments

Submitted by boody@slashproc.net on Sun, 22/01/2006 - 1:24am

انا شكلي هسافر أوغندا على حسابي. هو انت ايه اللي حصل لك هناك بالظبط يا محمد خلى الحياة بقى لونها بمبي كده؟

عالعموم ربنا يبسطك كمان و كمان و يبسطنا معاك

Submitted by msameer on Sun, 22/01/2006 - 3:07pm

حسيت ان انا لسه انسان و ممكن ناس تتبسط و انا قاعد معاها

!!!!!!!!!!

Submitted by نعّومة (not verified) on Sun, 22/01/2006 - 1:51pm

هاتسافر وتسيب حبايبك؟
لا يا مصري لا لا لا وألف لا، ليه تهجر بلدك وتسيبنا بلدك بك أولى.

مع السلامة

Submitted by msameer on Sun, 22/01/2006 - 3:06pm

انا لا مسافر ولا حاجه

يا حسره علينا :-)

Submitted by ezabi on Mon, 23/01/2006 - 11:04pm

يا جدعان حد يشوف فين سمير، الواد شكله اتخطف في الغابة ولا حاجه

Submitted by الست نعومة (not verified) on Tue, 24/01/2006 - 10:26am

ماحدش بيتخطف في الغابة لوسمحت، اللي عايز ينعزل بيختفي لوحده في الدغال بيعد عن الناس لحد ما يروق وبعد كده بيظهر تاني.
أرجوك ماتتهمش الغابة بأي حاجة.

Submitted by Anonymous (not verified) on Thu, 13/07/2006 - 10:36pm

هتلف تلف وترجع لبلدك وبعدين البلد اللي بتتكلم عليها دي احنا اللي عملنا فيها كده هتقولي انا معملتش حاجة .... كونك انك تشتم في بلدك دي مش حاجة ياخوانا فوقوا بقي البلد دي مش هتبقي كويسة غير بينا وبعدين ياللي بتتكلم على لغة البرمجة الجديده اللي عايز تتعلمها لو عايز تتعلم حاجة ممكن تجيب وتذاكر هنا والشغل موجود على قفا من يشيل بس هي دي حجة كل فاشل يقولك البلد البلد بتتكلم على لغات برمجة ايه c,c++,c#,php,jaba,vb,asp اي كانت لو عايز تتعلم الكتب موجوده على النت اللي عايز يجيب واللي يشتري هتروح بره تعمل مش كل اللي يسافر يبقي احمد زويل ولو انت فاكر ان الدنيا هناك سهلة مكنش حد غلب وبكره تندم

Add new comment

Subscribe to /  digg  bookmark